Eksotis, Ceunah….

0 1244

el

LEMBUR Rawa Kembang kacida genjleungna, lantaran aya tukang kosmetik keliling nu nawarkeun bisa ngajadikeun beunget jadi bodas. Atuh lain wanoja wae, para mbi, ema-ema katut nini-nini ge ngagimbung eta tukang kosmetik nu bisa nyulap beunget.

“Asal beurang peuting dipakena, dijamin saminggu bakal jadi bodas,” ceuk Mang Mamat,  tukang kosmetik, nawarkeun krim daganganna.

“Moal ateul Mang,” Neng Euis, tatanya.

“Ih…, moal atuh Neng, da ieu mah make bahan-bahan alami, tina tatangkalan,” tembal Mang Mamat.

“Naha geuning teu disebutkeun, dina wadahna,” ceuk Neng Euis deui.

“Ih naha nya, Eneng mah geulis-geulis, bawel,”  Mang Mamat rada samutut.

“Har … ari Amang, nya kudu atuh tatanya. Teliti sebelum membeli,” Neng Euis malik ambek.

“Hanas cape, nerangkeun, kin melina teu jadi,” tembal Mang Mamat.

“Buju….., ari Amang, kumaha arek dagang teh, karek ditanya kitu doang geus ambek. Embung mere penjelasan. Niat teu dagang teh. Atawa teu ngarti kana produk nu rek dijual,” Bi Eungkar norojol di warungna, bari rada molotot ka Mang Mamat.

“Sumuhun Tante, Karolin. Mangga…, bade naroskeun naon,” Mang Mamat leuleuy.

“Ih…., gagabah ngaganti ngaran batur. Ngaran urang man Eungkar Karyati, lain Karolin,” Bi Eungkar, ambek.

“Buju…., timbang kito doang ambek Ibi…., Pan biasana mun ka kota sok ganti ngaran. Tina Eungkar jadi Eung… Karolin, heu heuy….,” Mang Mamat nyengserikeun.

“ Ayena urang ambek beneran tah Mang. Ngaran uran menang mere kolot. Teu sagawayah, make bubur beureum bubur bodas tah ngaresmikeuna teh. Dihajatan Mang,” Bi Engkar samutut.

“Hampura atuh Bi. Tong gancang ambek bisi gancang kolot,” Mang Mamat, deudeupongan.

“Dihampura, tapi tong sakali-kali deui,” Bi Eungkar, imut ngageleyu.

Teu pati lila ti harita datang wa KARA sumiWANG, nu nembe wangsul di kota, balanja kanggo kaperyogian sadidinten. Sihoreng wa KARA sumiWANG geus ti tatadi datang, ngan ngahaja teu gujrud, ngabandungan heula kaum hawa nu rek balanja produk kosmetik.

“Lain…., ti tatadi Uwa geus ngadenge nu diobrolkeun ku maraneh. Bener tah Neng Euis kudu taliti kawas kitu mun rek barang beli. Komo nu rek dipake kana beungeut, kudu ati-ati pisan. Tong hayang bodas, tuntungna jadi siga udang menang ngagoreng, eta beungeut, jadi beureum lantaran iritasi. Heug jadi matak panyakit, kan susah kudu ngaluarkeun duit deui keur ngubaran,” ceuk wa KARA sumiWANG.

“Mun arek oge make kosmetik tina bahan alami. Tak kasay beungeut teh ku daun peteuy selong. Kinclong geura siga Ibi,” ceuk Bi Eungkar.

“Kono lah…., nu kawas kitu mah Bi. Siga jaman kuda ngegel besi wae. Nu praktis ieu tah…,” Mang Mamat nempokeun krim daganganna.

“Kono ge geus aya buktina, moal aya dampakna,” tembal Bi Eungkar.

“Tos ah…, naha jadi ribut kieu. Abdi mah Amang, Ibi, ngan hayang terang we tatanya ka Mang Mamat. Moal meli krim pemutih muka nu kawas kitu. Mun bener teh bisa ngabodaskeun beungeut, lucu atuh pan kulit Eneng mah hideung. Lamun beungeut bodas, awak hideung, jadi kawas badut. Ah….., keun bae beungeut jeung kulit hideung mah. Kan hideung Eneng mak eksotis lah…..,” Neng Euis, panjang lebar.

“Sepakat lah…. Neng Euis eksotik. Matakna urang resep tah,” Jang Juded ngago’ongan.

“Hadehhhh……, aya jalan komo meuntas, maneh nya Jang. Hayang ngarayu Neng Euis,” ceuk Bi Eungkar.

“Sakalian atuh…., mun ujung-ujung mah urang era. Neng Euis, tong hayang bodas, mening kitu, hideung santen. Eksotik tah nu matak lucu,” Jang Juned neugeskeun caritaannana.

“Kumaha ieu teh, jadi moal rek meli krim na?” Mang Mamat, motong caritaan.

“Sigana moal Amang. Rek dikasay we ku daun peteuy selong. Supaya eksotis…,” Neng Euis nembalan.

“Ah… dasar, lain ti tatadi lamun moal meli mah. Nawarkeun ka nu lain deui,” Mang Mamat kukulutus, bari ngaleos ninggalkeun eta riungan. (***)   

 

 

 

Category: Karawang, Obrolan, OpiniTags:
No Response

Leave a reply "Eksotis, Ceunah…."